Blogs

ስራሽ ምንድነው?

mul

ስራሽ ምንድነው?

በተደጋጋሚ ለስራ ሳመለክት ተመሳሳይ ጥያቄዎች ያጋጥሙኛል፤ የትምህርት ደረጃሽ ምንድነው፣ ከዚህ በፊት የት የት ሰርተሻል፣ በቀን ስንት ሰዓት ትሰሪ ነበር እና የመሳሰሉትን ጥያቄዎችን። እነዚህን መልሼ ሳበቃ ያቀረብኩት መረጃ ትክክል ሰለመሆኑ በፊርማዬ ኣረጋግጣለሁ የሚለው ላይ ፊርማዬን አኖራለሁ እውነት ይሁን ሃሰት እናንተው ትነግሩኛላቹ ።

ስራ ስባል የ፫(3) ልጆች እናት ነኝ፤ በቀን ቢያንስ ኣስራ ስድስት ሰዓታት እሰራለሁ ። የትምህርት ደረጃዬን ስጠየቅ በትምህርት ቤት ክፍል ውስጥ ገብቼ ያጠናሁትን ነው የምዘረዝረው ነገር ግን አካውንታንትም ኢኮኖሚስትም ነኝ ከወር እስከ ወር የቤቴን ገቢ አስተዳድራለሁ፣ አምፖል ሲፈነዳ ጠረጴዛ ላይ ወጥቼ እቀይራለሁ ኤሌክትሪክም እጠግናለሁ ስለዚህ ኤሌክትሪሺያንም ነኝ፣ የመኪናዬ ጎማ ሲተነፍስ ዝቅ ብዬ እቀይራለሁ መካኒክነትም እሞክራለሁ፣ ልጆቼ እና ባሌ ሲታመሙ ሙቅ ሰርቼ ፣ዳማከሴ አጠጥቼም ይሁን ባህርዛፍ አጥኜ አክማቸዋለሁ ዶክትር ቢጤም ነኝ፣ ልጆቼ ላይ የባህሪ ለውጥ ባየሁ ጊዜ ኣዋራቸዋለሁ እናም ኣማክራቸዋለሁ የስነልቦና ሃኪማቸውም ነኝ።

ትንሹ ልጄን አቅፌ አደግ አደግ ያሉትን ሲጫወቱ እንዳይወድቁ እና እንዳይጎዱ በዓይኔ እጠብቃቸዋለሁ፣ ምግብ እያበሰልኩ አለቃዬ በስልክ የሚያስተላልፍውን መልእክት እቀበላለሁ፤ ለዚህም ክህሎት ስጠየቅ ብዙ ስራ በአንዴ መስራት የምትችል (multitasking)እላለሁ። ከእዚህም ውጪ እቃ ማጠብ ፣ኣልጋ ማንጠፍ፣ ቤት ማፅዳት፣ ሌላም ሌላም ሌላም የምሰራቸው ስራዎች ናቸው እና ይህንንም እንዴት የስራ ማመልከቻው ላይ እንደማካትት ካወቃችሁ ብታማክሩኝ ደስ ይለኛል።

እንግዲህ ስራሽ ምንድነው ብሎ ልሚጠይቀኝ ሰው መልሴ ባጭሩ ይሄ ነው

ያኔት አሰፋ

Leave a Reply

Your email address will not be published. Required fields are marked *